Budyšin (SN/MiR). 19 šulerjow 3. a 4. lětnika­ Ralbičanskeje, Radworskeje, Chróšćanskeje, Pančičansko-Kukowskeje a Worklečanskeje zakładneje šule su zańdźeny pjatk na sobotu nóc w Budyskim Dźiwadle na hrodźe přebywali. Tam wotmě so lětuša, mjeztym 11. čitanska nóc, kotruž Němsko-Serbske ludowe dźiwa­dło zhromadnje z Rěčnym centrumom WITAJ wuhotuje. „W běhu jenož dweju dnjow po wozjewjenju, běchu wšitke městna wobsadźene“, rjekny projektowa sobudźěłaćerka RCW Michaela Hrjehorjowa. Po zetkanju při Maćijowej wěži podachu so dźěći do dźiwadła. Tam hrajachu hry k mjezsobnemu zeznaću. Wjerškaj wječora běštej wopyt probow za lěćne dźiwadło a klankodźiwadłowe předstajenje. Nimo toho rozhladowachu so po domje. Při wšěm tym jim zastupjerka intendanta za serbske dźiwadło Madlenka Šołćic někotružkuli rumnosć pokaza, kotraž hewak přihladowarjam přistupna njeje. „Mnozy nawróća so po tymle zarjadowanju ze staršimaj na předstajenja NSLDź, dokelž maja čitanskeho zarjadowanja dla wosebity poměr k dźiwadłu, wšako su sej tu hižo raz zuby rjedźili a spali“, rozłožuje Michaela Hrjehorjowa.