Zhorjelc (AK/SN). Nalětnje spěwy klinča po domje w Zhorjelcu-Klingewaldźe. Tam wotměwa so 6. fachowy dźeń kulturne kubłanje. Na jednej z dźěłarničkow po­kazuje kubłarkam a wučerkam spěwarka a spěwna pedagogowka Tanja Donatec z Budyšina, kak ma so spěwanje prawje zwučować. Wona formuje swoju hubu kaž ryba. To njeje muskulatura šije hižo tak kruta. „Podaš-li so do swěta spěwa a začuwaš-li, što spěwaš, móže ći to pomhać wobmyslenja přewinyć“, měni nawodnica dźěłarnički. Krok po kroku zbliža wona kubłarkam a wučerkam swět spěwa. Wone zwučuja zywać, zdychować, juskać a wokale wurjekować. Krótko na to imitěruja zwěrjata. „Wažne je hubu porjadnje wočinić. Při tym njesmě delnje čelesno­ napjate być“, Tanja Donatec rozjasnja. Hłuboko z brjucha bjerje wona energiju za spěwanje. „Bjerće so wróćo, njech spěwaja dźěći. Jako pedagoga nje­trjebaće stajnje sobu spěwać“, dawa wona pokiw za wšědny dźeń w pěstowarni a zakładnej šuli. Pokazuje dobre dźerženje ćěła a dychanje, štož so na dźěći přenjese. „Holcy a hólcy sej tójšto wothladaja. Spěwać je njeposrědnje z ćěłom zwjazane. Ćěło­ je naš instrument.