Budyšin (SN/bl). K poslednjemu razej wotměchu dźens dopołdnja w Budyskej dźěćacej a młodźinskej bibliotece prózdninski poskitk za dźěći pod hesłom „Dospołnje zanurjeni z wódnym mužom a jeho žonu“. W połdrahodźinskim programje so wšitko kołowokoło wody, kupanja, hatnych a mórskich wobydlerjow wjerćeše. Kristin Lehmann, sobudźěłaćerka dźěćaceje a młodźinskeje biblioteki, witaše dohromady 18 dźěći na zarjadowanju. Mjez nimi běchu dźěći prózdninskeho lěhwa, kotrež so tele dny w Bórku wotměwa. Na nim wobdźělitej so tež přećelce z Radworja. Po tym, zo běchu sej krótki film wo mórskich zwěrjatach wobhladali, słuchachu sćerpnje na stawiznu wo lawje, kotryž chcyše płuwać nawuknyć. Slědowachu někotre eksperimenty z wodu. W mjezyčasu čitaše Kristin Lehman stawiznu wo kózlatkach, šerjenju a zhromadnym dožiwjenju w kupjeli. Dale předstajichu zajimcam Łužisku jězorinu a jeje geografiske połoženje na karće. Naposledk rozpowěda Kristin Lehmann powěsć wo wódnym mužu a čitaše z knihi „Łužiske baje“ Ludoweho nakładnistwa Domowiny.