Wojerowski Johanneum integruje rěč wosrjedź wulkeje mnohotnosće
„Wšitko pruwujće, dobre dźeržće“ rěka napis w jědźerni Wojerowskeho Johanneuma. Pódla namolowaneje Janskeje cyrkwje steji tam citat na sćěnje w serbskej, jendźelskej, francoskej, ruskej, łaćonskej a grjekskej rěči. Tak pokazuje so bohatosć rěčow na křesćanskim gymnaziju, kotryž swjeći tele dny swoje 25lětne wobstaće.
Andreas Kirschke je so z jeho nawodu Günterom Kieferom rozmołwjał.
Kotru rólu hraje serbska rěč na wašim kubłanišću?
G. Kiefer: Serbšćina ma wysoku hódnotu. Wona je wot lěta 1992 kruće do šulskeho programa zapřijata. W přijimanskich rozmołwach za nowych šulerjow je wona kóžde lěto tema. To rěka, prašamy so šulerjow a staršich zaměrnje za jich zajimom za serbšćinu. Wabimy za rěč a pohnuwamy gymnaziastow, ju wuknyć. Wot wšeho spočatka maćernorěčna Serbowka, wučerka Andreja Ryćerjowa ze Šunowa, pola nas serbšćinu podawa. Chcemy tež přichodnje wučbu dołhodobnje a stabilnje z njej planować.
