Na Budyskim humanistiskim gymnaziju tójšto Serbow wuknyło
Budyšin (SN/at). Hłowne twarjenje Budyskeho Philippa Melanchthonoweho gymnazija zhladuje na 150lětne stawizny. Ze swjatočnosću stej kubłanišćo a Budyski archiwowy zwjazk pjatk tónle jubilej wopominałoj. Jako Philipp Melanchthon je wučer Jürgen Hähnel hosći witał, mjez nimi Budyskeho wyšeho měšćanostu Alexandera Ahrensa (SPD), měšćanskich radźićelow, nawodow Budyskich kubłanišćow, wučerjow a bywšich tudy skutkowacych pedagogow kaž tež šulerjow. Hähnel skedźbni na korjenje kubłanišća, lěta 1527 w Lutherowym mysle załoženu ewangelsku radnu šulu, „Nova schola Budissinensis“. Přednošk „wučerja Němskeje“ Philippa Melanchthona 25. junija 1559 w šuli mějachu po znowaetablěrowanju jako gymnazij města Budyšina 1992 za nastork, so wo mjeno kubłanskeho fachowca reformacije prócować. Wot 11. septembra 1998 je gymnazij po Melanchthonje pomjenowany. Kubłanišćo wuznamjenja respektapołne a tolerantne wobchadźenje mjez wučerjemi a šulerjemi, kaž Jürgen Hähnel rjekny.