Šulerjo a přichodni kubłarjo ze swojimi znajomosćemi přeswědčili
Budyšin (SN/MiR). 28 žonow a muži wuknje powołanje kubłarki/kubłarja w tuchwilnym 1. lětniku w powołanje přewodźacej rjadowni na Serbskej fachowej šuli za socialnu pedagogiku Budyšin, kotraž je přirjadowana tudyšemu powołanskošulskemu centrumej (BSZ). Mjez 28 šulerjemi su tež štyrjo Serbja, wšitcy wukubłancy, kotřiž swoje praktiske wukubłanje w dźěćacych dnjowych přebywanišćach w nošerstwje Serbskeho šulskeho towarstwa wukonjeja. Su to Silwana Gruberowa z Worklec, Jadwiga Wróblec z Kamjeneje, Fabian Ćěsla z Hórkow a Judit Heroldowa z Bělšec, kotraž zdobom w Budyskim zarjedźe SŠT skutkuje. Woni předstajichu wčera wopytowarjam klankodźiwadłowu hru „Čerwjenawka“, kotruž běchu zhromadnje z wučerjemi nazwučowali. „Smy ryzy serbski kruch pokazali“, rjekny Judit Heroldowa, „tak budźe nadźijomnje móžno jón pozdźišo w serbskich a Witaj-pěstowarnjach předstajić.“ Klankodźiwadło bě wobłuk klawsury w třoch wukubłanskich předmjetach.