Wojerecy (AK/SN). Křesćanski gymnazij Johanneum Wojerecy chce serbšćinu w dźěłowym zjednoćenstwje dale poskićeć. Tole potwjerdźi Katrin Goering, zastupowaca šulska nawodnica, sobotu na dnju wotewrjenych duri. „W tymle šulskim lěće nimamy serbšćinu. Dźěłowe zjednoćenstwo so chorosće wučerki dla njewotměwa. Pytamy jako zastup maćeršćinarjow z wobłuka gymnazija abo wyšeje šule.“

Šula nadźija so na nawrót wjelelětneje wučerki za serbšćinu Andreje Ryćerjo­weje, kotraž tam wot wšeho spočatka skutkuje. „Chcemy definitiwnje serbšćinu dale poskićeć“, rozłoži šulski nawoda Günter Kiefer. Kulowčanka Angelika Czapi­kowa bě před lětami na Johanneumje geografiju w serbskej rěči podawała a je Brigitu Šraminu, kotraž serbšćinu wuwučowaše, podpěrała. Wučba bě a je dobrowólny poskitk. Loni mějachu jón kóždu wutoru wot šesteje do wosmeje hodźiny. Andreja Ryćerjowa wuwučowaše, při projektach podpěrowaše ju Angelika Czapikowa.