Choćebuz (SN/MiR). Internetnu peticiju delnjołužiskich staršich za spušćomne rjadowanje wučby serbšćiny w Braniborskej je mjeztym wjace hač 34 000 ludźi podpisało. Tele dny hakle je załožerka staršiskeje iniciatiwy Kathleen Komolka wospjet naležnje wo podpisanje peticije prosyła. Za to wužiwa wona mjez druhim platformu Facebook. Iniciatiwa stara so wo zachowanje delnjoserbšćiny na braniborskich kubłanišćach, předewšěm šulskich. Wot njedźele hač do wčerawšeho je ju zaso wjace hač dźesać ludźi podpěrało. Postup při podpisanju peticije móža zajimcy wobstajnje na internetnej stronje www.change.org pod hesłom „Minis­terin Ernst: WITAJ muss bleiben“ slědować. Dodate je wuprajenje: „My starši wojujemy za wučbu serbšćiny našich dźě­ći“. W swojej namołwje Komolka piše: „Trjebamy Će! Podpisaj a informuj so wo našej peticiji.“ Wona potwjerdźa swoju próstwu z tym, zo k zhromadnosći na dobro delnjoserbskich dźěći napomina: „Wone móža přichodnje delnjoserbšćinu wuknyć a rěčeć a ju tak žiwu wobchować.