Wjesnjanosća serbskich gmejnow maja žadanja
Worklecy/Njebjelčicy/Ralbicy/Radwor (SN/MiR). Městna za dźěći, kotrež chcedźa w serbskich gmejnach do horta chodźić, w nimale žanej z nich njedosahaja.
Gmejna Worklecy, nošerka tamnišeho horta, prócuje so wo spěchowanske srědki za nowotwar tajkeho zarjadnišća. Tuchwilu přizwola młodźinski zarjad wokrjesa gmejnje městno za 95 hortowych dźěći. „Nawodnica zakładneje a nawoda wyšeje šule staj wobaj wospjet na to skedźbniłoj, zo je nowy hort trěbny“, rjekny na naprašowanje Worklečanski wjesnjanosta Franc Brusk (CDU). Ležownosć, kotraž je we wobsydstwje gmejny, za to hižo maja, a planowany je projekt za 120 dźěći. Twarski dohlad je sej wšitko wobhladał a projektej přihłosował. Na twarsku dowolnosć gmejna nětko čaka. Sumu inwesticije wobličeja fachowcy na 1,8 milionow eurow. Spěchowanje pak njeje dawno hižo tajke, kaž bě spočatnje ze stron Sakskeje za nowotwar tajkeho zarjadnišća připowědźene. Wone bu wot spočatnje 80 na tuchwilu 50 procentow znižene. Nowy kredit brać pak sej gmejna dowolić njemóže.
