Serbske a serbšćinu podawace šule pěstuja mjezu přesahowace styki
Budyšin (SN/MiR). Zańdźene šulske lěto 2017/2018 je 165 sakskich kubłanišćow pěstowało šulske partnerstwa do Pólskeje a Čěskeje. To zdźěli statne ministerstwo za kultus, kotrež chce dalše sakske šule za mjezu přesahowacu wuměnu zdobyć. Mjez kubłanišćemi, kotrež tajke zwiski hižo wjacore lěta haja, zdźěla hižo wot časa do měrliweje rewolucije, su tež serbske a serbšćinu wuwučowace. Tak wudźeržuje Chróšćanska zakładna šula „Jurij Chěžka“ styki do pólskeho městačka Leśnica. Hakle před něšto wjace hač tydźenjom su so wučerjo a šulerjo wobeju šulow w Chrósćicach zetkali. Ralbičanscy wyši šulerjo su měli wospjet w lěću zhromadne dožiwjenja ze šulerjemi z čěskeho Mělnika. Radworska zakładna a wyša šula „Dr. Marja Grólmusec“ pěstujetej wobstajne kontakty do pólskeje wsy Rząsiny w Delnjej Šleskej. Čěšćinarjo 6. lětnika Budyskeho Serbskeho gymnazija su w juniju wuknjacych z partnerskeje šule Varnsdorf w Liberecu zetkali. Čiłe partnerstwo přez wjele lět haji tež Budyska Serbska zakładna a wyša šula.