Forum a dźěłarnički fachowy dźeń 2plus wosebje wobohaćeli
Chrósćicy (SN/MiR). Wěcywustojnje a z wulkim angažementom přihotowany běše lětuši fachowy dźeń 2plus. To zwurazni nawoda Budyskeje regionalneje wotnožki Sakskeho krajneho zarjada za šulu a kubłanje Mathias Peter sobotu rano w Chróšćanskej wjacezaměrowej hali „Jednota“. Serbsce a němsce witaše wón wjace hač 90 zajimcow na mjeztym tradicionalne zarjadowanje. Statne ministerstwo za kultus bě ze swojim zarjadom LaSuB w kooperaciji z Budyskim Rěčnym centrumom WITAJ wospjet na fachowy dźeń přeprosyło. Mathias Peter dopominaše na to, zo šule po ewaluaciji a po oficialnym zawjedźenju w lěće 2014 po koncepciji 2plus mjeztym dlěje hač dźesać lět dźěłaja. „Towaršnostny wobswět je so w tym času změnił. Za koncept je rozsudnje hódne, na kotre wašnje serbsku rěč a jeje nałožowanje do wšědneho dnja integrujemy.“ Dale a bóle wón potwjerdźa na to zhladować, kotre naprawy wužiwanje serbšćiny podpěruja.
