Zhromadna šula tuchwilu hišće žana tema
Budyšin/Chrósćicy (SN/MiR). Čłonojo předsydstwa Serbskeho šulskeho towarstwa (SŠT) su so z temu dlěšeho zhromadneho wuknjenja rozestajeli. Ludmila Budarjowa zdźěli na naprašowanje SN, zo maja ideju zhromadneje šule nastupajo serbske kubłanišća za ćežko zwoprawdźomne. Tak móža dotal jenož hypotezy nastajić. Wuchadźejo z ličby šulerjow by zhromadne wuknjenje k dalšej centralizaciji wjedło. Małe wjesne šule a małe wuknjenske skupiny bychu so pozhubili. Nawoda Serbskeje zakładneje šule „Jurij Chěžka“ Chrósćicy Měrko Šmit znaje namjet nastupajo wjetšu přepušćiwosć a efektiwnišu integraciju a inkluziju w Serbach a měni: „Hladajo na přikład na socialny pochad dźěći, na kognitiwne rěčne zamóžnosće praktikujemy hižo jara dołho zhromadne wuknjenje w našich šulach.“ W Budyskej regionalnej wotnožce Sakskeho krajneho zarjada za šulu a kubłanje (LaSuB) zhromadna šula tuchwilu scyła žana tema njeje. Zamołwity za serbske šulske naležnosće Bosćij Handrik praji: „To je politiske hibanje respektiwnje wotpohlad iniciatiwy.