W Choćebuskim RCW wuwija po hornjoserbskim přikładźe nowy poskitk

Choćebuz (SN/MiR). W swojej Choće­buskej wotnožce zahaji Rěčny centrum WITAJ w lěće 2019 nowe předewzaće. W Hornjej a srjedźnej Łužicy hižo dlěje znaty digitalny poskitk za nawuknjenje serbšćiny „Krok po kroku“ ma nětko tež za delnjoserbšćinu nastać.

W Budyskim RCW na poskitku w hornjoserbšćinje tohorunja dale dźěłaja. Starać chcedźa so wosebje wo přistup do šulow. „Mjeztym je sydom lekcijow zdźě­ła­nych, dalše štyri chcemy lětsa w prěnim kwartalu lěta wozjewić“, rjekny nawod­nica Rěčneho centruma WITAJ dr. Beata Brězanowa. Mjeztym pak hižo nic z pomocu přidatnych projektowych pjenjez, ale ze swójskich srědkow RCW.