Priwatnym zajimcam njemóža kurs serbšćiny podawać
Budyšin (SN/MiR). Wučerjo, kotřiž njejsu dołho składnosć měli swoje serbskorěčne kmanosće polěpšić a to nětko chcedźa, maja za to tuchwilu dobru składnosć. Regionalna wotnožka Sakskeho krajneho zarjada za šulu a kubłanje w Budyšinje (LaSuB) mjeztym druhi kurs serbšćiny zarjaduje. Wot lońšeho septembra hižo Dušan Šołta tydźensce štwórtk popołdnju dwě skupinje wuwučuje. Kurs traje hač do kónca šulskeho lěta 2018/2019. Jeho zaměr je, zajimcam sposrědkować zakładne znajomosće serbskeje rěče resp. je pohłubšić. Ličba wuknjacych móhła hišće wjetša być, LaSuB nadźija so tuž perspektiwisce na dalšich zajimcow.