Dźěćacy ptačokwasny program přeswědča a překwapja
Budyšin (SN/MiR). Lětuši dźěćacy program SLA „Ptačokwasny són“ złožuje so na inscenaciju z lěta 1997. Libreto, to rěka literarnu předłohu, staj Juraj Šiška a Jěwa-Marja Čornakec po wjetšinje z originala přewzałoj. Přiwšěm překwapja inscenacija z nowosćemi. Hižo na internetnej stronje SLA, w pokazkach na terminy předstajenjow, móže zajimc z pomocu serbskeje chorhojčki spóznać, kotre z 25 předstajenjow su serbskorěčne. „Tajke změjemy w Chrósćicach dwě a jedne w Budyšinje“, rjekny zamołwity za nowinarske dźěło SLA Stefan Cuška. Mjenowane chorhojčki njejsu hišće předołho do internetnych poskitkow zapřijate, nastupajo dźěćacy ptači kwas lětsa prěni króć. Młodźi přihladowarjo přijědu z busami KuBiMoBila na zarjadowanja. Tamniši sobudźěłaćerjo staraja so wo transport. Na prěnimaj zarjadowanjomaj srjedu we Wojerowskej Łužiskej hali witachu tam wjace hač 1 600 wopytowarjow. Dohromady wočakuja ansamblowcy na wšě 8 000 dźěći, młodostnych a dorosćenych na lětušich zarjadowanjach.