Wjace hač wučer mjez ludom

štwórtk, 11. apryla 2019
artikl hódnoćić
(0 )
Na kubłanskim a diskusijnym zetkanju Koła serbskich spisowaćelow 1957 bě so tež Jurij Wjela (druhi wotprawa) wobdźělił.  Foto je awtor Pětš Janaš njedawno namakał a so na swojeho wučerja dopominał. archiw Pětša Janaša Na kubłanskim a diskusijnym zetkanju Koła serbskich spisowaćelow 1957 bě so tež Jurij Wjela (druhi wotprawa) wobdźělił. Foto je awtor Pětš Janaš njedawno namakał a so na swojeho wučerja dopominał. archiw Pětša Janaša

Mysle k 50. posmjertninam docenta a spisowaćela Jurja Wjele

Jurij Wjela (4. měrca 1892–6. apryla 1969) je w mojim spomnjeću přećelny, dostojny a měrny čłowjek z wysokim etosom a wobšěrnej wědu, a wón njebě jeno za mnje čłowječny a narodny přikład.

Zeznach česćeneho wučerja Wjelu, jako nastupi wón 1948 městno jako direktor Serbskeje wyšeje šule. Přińdźech do 9. lětnika a wón bě naš rjadowniski wučer. Wobaj běchmoj štyri lěta na šuli. Wón dźěše 1952 jako docent na Serbski pedagogiski institut do Małeho Wjelkowa, ja podach so na studij do Lipska.

Wězo zeznach tež literata Wjelu, kiž bě jako prozaist a dramatikar připóznaty. Powědančka běše hižo do Prěnjeje swětoweje wójny wozjewił, a mjez wójnomaj nastachu po zaběranju ze serbskimi stawiznami hry kaž „Knjez a roboćan“ (1931), wo bědźe w serbskej wsy za čas feudalizma, a „Naš statok“ (1937), wo žiwjenju Serbow w Třicećilětnej wójnje. A přećiwo hitlerskemu režimej měritej so „Zhubjena njewjesta“ (1935) a „Paliwaka“ (1936).

wozjewjene w: Kubłanje
Prošu přizjewće so, chceće-li komentar podać

Serbska debata

nowostki LND