Tamniša staršiska iniciatiwa je inowatiwny kubłanski projekt zahajiła

Radwor (SN/MiP). Radworska gmejna je wočiwidnje městno do přichoda sahacych inowacijow. We wjesce Kamjenej (Radworskim gmejnskim dźělu) rodźeny Serb Mikławš Joachim Wićaz je jako profesor na instituće TU w Drježdźanach 1955 prěni ličak NDR stworił. Prof. dr. Wolfgang E. Nagel, jeho dźensniši naslědnik w instituće, je jedyn z iniciatorow natwara Němskeho centruma za astrofyziku (NCA) we Łužicy. Druhi inowator-informatikar je Radworčan Wito Bejmak, kotryž bu hakle wóndano za swoje zasłužby kołowokoło digitalizacije a zawjedźenja serbšćiny do digitalneje doby z Mytom Zejlerja wuznamjenjeny. Zdobom je wón kopředsyda towarstwa Staršiskeje iniciatiwy Radwor z.t., kotrež je nowy, do přichoda sahacy projekt „Serbski experiMINT campus Radwor“ zahibało. Załožba za serbski lud jón we wobłuku spěchowanskeho programa „Serbska rěč a kultura w změnje strukturow“ spěchuje.