Serbska zakładna šula Budyšin dyrbješe dźesać nowačkow wotpokazać

Budyšin (SN/MiR). Na Budyskej Serbskej zakładnej šuli je za šulske lěto 2023/2024 wjace šulskich nowačkow přizjewjenych, hač maja tam městna. Kubłanišćo je dwučarowe, byrnjež aktualnje jedyn lětnik třičarowy był. Z dwučarowosću pak su tam rumnostne, ale tež personelne kapacity nastupajo wučerjow, wućežene. Ze zahajenjom noweho šulskeho lěta 21. awgusta 2023 wutworja tuž na šuli dwě rjadowni prěnjeho lětnika, jednu z 23 a dalšu ze 24 šulerkami a šulerjemi, potajkim w cyłku 47, zdźěli na naprašowanje našeho wječornika Clemens Arndt ze Sakskeho krajneho zarjada za šulu a kubłanje (LaSuB). Wězo njeje lochko, z wulkeje ličby zajimcow wuzwolić. Wšako wjetšina staršich dokładnje wo tym rozmysluje, dokal chcedźa swoje dźěćo do šule słać. Za tutu šulu pak płaća wosebite rjadowanja. Tuž su dźesać staršim dyrbjeli rjec, zo próstwje wotpowědować njemóža a zo dyrbi jich dźěćo na druhej zakładnej šuli, kotruž su mjenowali, wuknyć. Kóždy staršiski dom ma tak a tak při přizjewjenju za swoje dźěćo dwě šuli napisać.