Šulski nošer, statny zarjad, serbske institucije a towarstwa su wužadane

Budyšin (SN/MiR). Najwjetše přeće amtěrowaceje nawodnicy Budyskeje Serbskeje zakładneje šule je, zo móža wšitke dźěći tam, hdźež to chcedźa, serbsce wuknyć. To je žadanje paragrafa 25 sakskeho šulskeho zakonja. Přiwšěm njeje to jednorje zwoprawdźić. „Smy dwučarowa šula. Zo móhli wšitke dźěći přiwzać, kotrychž starši to chcedźa, trjebamy pak w kóždym lětniku tři rjadownje“, praji amtěrowaca šulska nawodnica Andrea Rätzowa, „za to pak pobrachuja nam rumnosće a wučerjo.“ Budyski wokrjes jako šulski nošer, statne zarjady kaž Budyska wotnožka sakskeho krajneho zarjada za šulu a kubłanje (LaSuB) kaž tež serbscy partnerojo kaž Domowina z Rěčnym centrumom WITAJ a tež Serbske šulske towarstwo to hižo lěta dołho wědźa. Něhdyša šulska nawodnica Christa Paulowa, tuchwilna Annette Natušowa a aktualnje amtěrowaca Andrea Rätzowa su w rozmołwach a z listami wospjet na zakonske a žadanja staršich skedźbnili. Tola změniło so wjele njeje.