Projekt na Worklečanskej wyšej šuli ma być zakład dalšich poskitkow

Worklecy (SN/MiR/MG). Wšitcy šulerjo Serbskeje wyšeje šule „Michał Hórnik“ we Worklecach zaběraja so tutón tydźeń z digitalnymi medijemi. Sobudźěłaćerjo medijopedagogiskeho projekta Serbskeho šulskeho towarstwa LUCIJA a nawodnistwo kubłanišća stej zhromadnje ideju wuwiłoj, šulerjow pod hesłom „Medije a žiwjenje - Wšitko digitalne?“ we wobchadźenju z nowymi medijemi kubłać. „K tomu słuša, dźěćom a młodostnym wuwědomić, kotre šansy a strachi tale tema w sebi chowa“, rjekny koordinator LUCIJE Michał Cyž. Na tři­dnjowskim projekće, kiž wot póndźele do jutřišeho traje, je wšěch něhdźe 180 šulerjow a šulerkow wobdźělenych. Runje tak zapřijaty je kompletny team wučerjow a wučerkow. „Sym přewšo wjesoła, zo je so cyły kolegij za projekt wuprajił“, rjekny šulska nawodnica Diana Šołćina, „někotři skutkuja jako referenća, dalši šulerjow přewodźeja. Najwažnišo pak je, zo maja wšitcy tutón poskitk za swójske dalekubłanje.“ A zakładna šula pomha wyšej šuli z dźěłowymi městnami w swojim kompjuterowym kabineće.