Putnikowanje do Róžanta zaso wjeršk nabožneho tydźenja
Róžant (SN/MiR). „To njewidźomne sej wotkryć“ je hesło lětušeho nabožneho tydźenja. Na přewšo zrozumliwe wašnje rysowaše Radworski farar Beno Jakubaš w swojim prědowanju w Róžeńčanskej hnadowne cyrkwi, zo móžeš jeničce ze swojej wutrobu a dušu so toho dohladać, štož je w čłowjeku schowane. Wón běše ze skupinu 80 wobdźělnikow a přewodnikami do Róžanta přišoł. Skupina młodostnych je ze skečom dźěćom přistup tematice z diskusiju wo wuměłskej twórbje – čornobarbna tafla – dała. Dale přinošowachu tomu spěwy, kotrež band pod nawodom Michała Cyža a Sabiny Jurencec přewodźeše. Najdlěši procesion bě sej z Chrósćic do swjatnicy katolskich Serbow doběžał, najkrótšej z Baćonja a Njebjelčic. Tak běchu krótko po dźesaćich dołhe rynki dźěći a młodostnych, kotřiž chodźachu dotal do 1. hač do 8. lětnika a jich přewodnicy, mjez Nowej Wjesku a Róžantom widźeć.