Drježdźany (SN/MG). Je tomu hižo něšto wjace hač tři lěta, zo započinachu slědźerjo Drježdźanskeje uniwersitneje kliniki šulerkam a šulerjam kaž tež wučerkam a wučerjam na Serbskim gymnaziju w Budyšinje krej wotewzać. Přičina wzda so wobdźělnikam studije tehdy chětro spodźiwna: Wuslědźić chcyše team ­wokoło prof. dr. Bernera a dr. Armanna mjenujcy, w kotrej měrje wuskutkuja so šule na wuwiće pandemije.

Nětko su prěnje wuslědki wozjewili a tute wopodstatnja měnjenje wšelakorych fachowcow: Šule njeběchu we wosebitej měrje ćěrjak pandemije. Nawopak, wone zarjaduja so do cyle „normalneho“ wuwića ličbow a padow, kaž tež do incidentnych kwotow. Hižo w lěću 2022 ­wozjewi studijny team na internetnej stronje Ärzteblatt.de prěnje wuslědki a hižo tam bě tendenca wuslědźenjow wotwidźomna.

Što pak nam nětko pomha, zo je so na 13 šulach mjez 10 a 50 procentami šulerstwa a wučerstwa w ramiku studije na imunizaciju přepytować dało? Na to namakaja slědźerjo cyle jednoru wotmołwu: „Wuslědźić chcychmy, kotru rólu hraja dźěći a młodostni w šulach za wuwiće pandemije“, pisaja w zakónčacym dossieru.