Na fachowym dnju přepytowanje rěčneho niwowa šulerjow prezentowali

Slepo (SN/mb). W kopatej połnej sportowni Němsko-Serbskeho šulskeho kompleksa su wučerjo nimale wšěch serbskich šulow wčera wubrane wuslědki přepytowanja rěčneho niwowa šulerjow zhonili. Před lětom je team pod nawodom rěčespytnicy dr. Jany Šołćineje, kotremuž přisłušeja tež Manuela Smolina, dr. Leńka Šołćic a Jan Bogusz, nadawk přewzał, wuskutki w Serbach dołho a horco diskutowaneho kubłanskeho modela 2plus na rěčny niwow šulerjow přepytować. Nadawkipřijimar běše Serbski institut. Sakske kultusowe ministerstwo spěchuje projekt financielnje a wotnožka krajneho zarjada za šulu a kubłanje Budyšin jón koncepcionelnje podpěruje.