W Delnjej Łužicy chce Rěčny centrum WITAJ (RCW) kubłanišća k intensiwnišemu zhromadnemu dźěłu pohnuwać. Gunda Heyderowa, wědomostna sobudźěłaćerka RCW w Choćebuzu, rozjimaše swoje dopóznaća z wosebiteho naprašnika.
Přewažnje za čas koronapandemije je so Gunda Heyderowa mjez druhim z kooperaciju mjez pěstowarnju a zakładnej šulu zaběrała. Wona zwěsći, zo je tuta w cyłku poměrnje dobra. Přiwšěm pak so serbska rěč a kultura hustohdy zanjechatej. Wona skedźbni na to, zo dyrbja dźěći, kotrež sej serbsku rěč jako druhu rěč přiswojeja, z nowymi narokami a strukturami šulskeho wobswěta wuńć. Zdobom pak su wužadane, w rěči wuknyć a komunikować, kotraž njeje jich prěnja, to rěka jich sylna rěč. „Při tym mamy sej wuwědomić, zo pedagogiscy fachowcy hustohdy serbscy maćernorěčni njejsu a zo jenož jara mało staršich tutu rěč wobknježi.“