Sakske knježerstwo přetworjenje powołanskeje akademije zahibało

Čorny Chołmc/Budyšin (SN/at). Powołanska akademija Sakskeje přeměni so na Dualnu wysoku šulu Sakskeje. Naćisk za to trěbneho zakonja je statne knježerstwo wčera na wuradźowanju w Čornym Chołmcu wobzamknyło. Po słowach ministra za wědomosć, Sebastiana Gemkowa (CDU), njeńdźe wo to „tafličku při durjach“ wuměnić, ale hódnotu wotzamknjenjow dźensnišeje powołanskeje akademije zwyšić. Studij zakónči so z akademiskim titlom. Nimo toho budu móžnosće dualneho masteroweho studija. Poskitki dale na dualne studijne předmjety wusměrjeja, kiž praksu zapřijeja, zo bychu dualnu wysoku šulu wot wysokich šulow za nałožowane wědomosće, kaž w Žitawje/Zhorjelcu, wotmjezowali.