Křesćan Lebza je dobreje mysle. Čehodla tež nic? Jemu je so dotal tójšto poradźiło. Žiwjenje je jeho po zajimawych pućach wjedło. Chróšćan je po wuchodźenju šule w dobrowólnym socialnym lěće skutkował a to w Němčan pěstowarni „Pumpot“, kotraž je w nošerstwje Serbskeho šulskeho towarstwa. „Tam sym w swojim dźěle z najmjeńšimi dźěćimi spóznał, zo je powołanje kubłarja za mnje prawy powołanski směr“, wón spokojnje praji. Na Serbskej fachowej šuli za socialnu pedagogiku w Budyšinje wukubłany kubłar je někotre lěta w Drježdźanskej wokolinje dźěłał a na to w Hildesheimje socialnu a organizatorisku pedagogiku studował. „Sym dźesać lět zwonka Łužicy skutkował. Nětko sym wjesoły, zo móžu w maćernej rěči pola Rěčneho centruma WITAJ w Budyšinje jako socialny dźěłaćer za swójbne kubłanje dźěłać.“ W tutym zmysle organizuje wot lětušeho awgusta kóždu póndźelu na Žitnych wikach w Budyšinje „komunikaciske blido“. „Poskićuju swójbam abo dorosćenym, kotřiž so na mnje ze prašenjemi a problemami nastupajo swójske socialne połoženje wobroćeja, pomoc.