Budyšin (AN/SN). Wot oktobra hižo je městno zamołwiteje abo zamołwiteho za runostajenje w Budyskim wokrjesu njewobsadźene. Kaž rěčnica Sabine Rötschke zdźěli, pyta krajnoradny zarjad tuchwilu internje za kmanymi kandidatami. „Tele postupowanje we wjacorych schodźenkach je krótko do zakónčenja. Dalokož njehodźi so naležnosć rozrisać, ma so městno zjawnje wupisać“, wona na naprašowanje zdźěli. Nadawki, kotrež městno wopřijima, spjelnja tuchwilu zastupjerka. To nic pak w dotalnym wobjimje, dokelž njeje kolegina jeničce za tónle wobłuk přistajena. Za Budyski krajnoradny zarjad su nadawki zamołwiteje abo zamołwiteho za runostajenje winowatostny nadawk. To korjeni we hłownych wustawkach, kotrež so na wotpowědne zakonje měrja. Přiwšěm pokaza wokrjes na to, kak wažny angažement za škit žonow kaž tež mužow přećiwo namocy je. Tak je minjeny pjatk, dźeń do mjezynarodneho dnja škita před namocu přećiwo žonam, před krajnoradnym zarjadom chorhoj kampanje zmawowała, zo by wokrjes zjawne na to skedźbnił.