„Sto tysac serbowacych 2100“ – kak daloko smy lětsa dóšli?

Budyšin/Smjerdźaca (SN/mb/MiR). Sto tysac serbowacych hač do wróćicy lětstotka – w lońšim hodownym wudaću našeho wječornika sće prěni raz čitali, zo je so team ZARI w nošerstwje Domowiny z tutym zaměrom do dźěła podał. Mjeztym je jeho struktura z jědnaće dźěłowymi městnami wotpowědnje nadawkam dotwarjena, kotrež su zastupjerjo „syće za regionalnu identitu a serbšćinu“ spočatk nazymnika w Delnim Wujězdźe prezentowali. Kajke płody dźěło projektneho tema w kooperaciji z regionalnymi rěčnymi motiwatorami ponjese, budźemy hakle za něšto lět pohódnoćić móc. Wšo dohromady nastawa ze srědkow změny strukturow za serbski lud něhdźe sto nowych dźěłowych městnow. Nimo nowych akterow je tež wupruwowanych kaž Marek Krawc, kotryž je wot róžownika 2021 rěčny docent za dorosćenych w Rěčnym centrumje Witaj (RCW). Wón sam ma tuchwilu 15 kursow na starosći, w běhu třoch lět je něhdźe 150 ludźi w našej maćeršćinje tak wukmanił, zo móžeš so z nimi znajmjeńša wo jednorych wěckach wšědneho dnja dorozumić.