Na Choćebuskej uniwersiće móhli załožerjo w maćeršćinje komunikować

Choćebuz (SN/MiR). Něhdyša płuwarnja wosrjedź Choćebuza słuži dźensa mjez druhim jako centrum Braniborskeje techniskeje uniwersity a dalšich akterow za łužiske start-upy. W startowym bloku B2 zběraja a wuwiwaja ideje za natwar nowych, młodych předewzaćow w Braniborskej, předewšěm we łužiskim regionje. Za projekt „Serwis za start-upy na BTU Choćebuz-Zły Komorow“ zamołwity je zawodny hospodar Viktor Zakar, kiž wot lěta 2022 tam skutkuje. Projekt spěchujetej Europska unija kaž tež kraj Braniborska mjeztym hižo 16 lět.