W dojutrownym tydźenju wotměwachu so na Budyskej Serbskej zakładnej šuli lětsa wjace aktiwitow, hač minjene lěta. Nimo tradicionalneho jutrowneho projekta a jutrowneho spěwanja při jutrownej studni na Mjasowych wikach z Budyskim wyšim měšćanostu Karstenom Vogtom přewjedźeštej na kubłanišću paralelnje dalšej projektaj.

Jedyn z tuteju projektow wotměwaše so pod hesłom „From Ragtime to early Jazz“. Hudźbnikaj Mario Meusel a Christian Schöbel ze skupiny 2Hot z Dohny zahorištaj na šulerskim koncerće. Wonaj staj so zhromadnje z dźěćimi na historiske pućowanje ke korjenjam ragtima, boogie-woogija a swinga hač k jazzej podałoj. Koncert běše interaktiwnje wuhotowany. Tak su šulerjo z nimaj bubnowali a na klawěrje hrali. Atmosfera běše přewšo wulkotna, zahorjaca a połna energije, čemuž so nichtó wuwinyć njemóžeše. Wšitcy so tam a sem čumpachu, kleskachu a pohibowachu so w takće sobu. Na kóncu žadachu sej dźěći přidawk.