Kubłarjo, wučomnicy a studenća z Bretoniskeje a Walesa we Łužicy
Budyšin/Lipsk (SN/MiR). Drježdźanske Towarstwo Europa Direkt – Institut za interkulturelne a europske studije spěchuje wuměnu na polu kubłanja mjez Francoskej a Němskej. Tele dny wobhonjeja so młodostni z Bretoniskeje, kotřiž chcedźa so z kubłarjom abo kubłarku stać, wo serbskorěčnym kubłanju. Wčera dopołdnja su so w Budyskim Serbskim muzeju wo stawiznach a kulturje Serbow informowali. W Budyskim Serbskim domje rozłoži jim sobudźěłaćerka Rěčneho centruma Witaj Jadwiga Kaulfürstowa detaile serbsko resp. dwurěčneho serbsko-němskeho kubłanja w pěstowarni kaž tež w šuli a wotmołwi na prašenja młodostnych kaž tež jich přewodźacych. „Wosebje zajimowana sym na informacijach z wašeho boka, kak jako přichodni kubłarjo z tym wobchadźeće, dźěćom bretonšćinu, kotraž słuša w Francoskej k mjeńšinowym rěčam, posrědkować“, Kaulfürstowa so na přitomnych wusměriwši rjekny. W běhu zarjadowanja wona zhoni, zo so w Bretoniskej jenož hišće w mało swójbach bretonsce rěči.