Choćebuz (SN/MiP). Na Delnjoserbskim gymnaziju w Choćebuzu su so wčera zastupjerjo staršich, šulerjow, wučerjow, šulskeho wjednistwa, Domowiny kaž tež šulskeho nošerja, města, na šulsku konferencu zešli, zo bychu móžnosće skrućenja serbskeho profila šule diskutowali. Zakład wuměny běše katalog z něhdźe 60 namjetami, kotrež běchu starši, šulerjo kaž tež absolwenća gymnazija w aprylu a meji tutoho lěta sformulowali. Wobdźělnicy, mjez nimi tež direktor gymnazija dr. Matthias Guttke a jednaćel Domowiny Marcus Końcaŕ, su sej wuběr namjetow, kotrež serbske młodźinske dźěło na gymnaziju přisporja w detailu wobhladali a rozjimali. Šulske wjednistwo kaž tež Domowina stej sej přezjednej, zo chcetej při tym zhromadnje postupować. Po informacijach Hajka Kozela, šulskeho rěčnika staršich, dźěše wčera tež wo to, wujasnić, kak móhła Domowina jako zastupjerka zajimow Serbow při tym podpěrować, tute namjety zwoprawdźić, runje tež w zmysle lobby-dźěła napřećo druhim wobdźělenym stronam.