Přihoty za lětuši Mjezynarodny lětni kurs za serbsku rěč a kulturu Serbskeho instituta (SI) su dawno zaběželi. Tuchwilu planuja hišće wobrubjace ekskursije, přednoški a wudospołnjace kulturne poskitki.

Budyšin (MD/SN/bn). Wšo dohromady je so 34 wosobow z dźewjeć krajow za kurs přizjewiło, kaž w zdźělence medijam SI rěka – porno minjenemu seminarej z cyłkownje 51 wobdźělnikami jasnje mjenje. Lětsa wotměja jón wot 12. do 27. julija w Budyšinje. Hač do srjedź meje bě zajimcam móžno, so za njón přizjewić. Tuchwilu planuja so ekskursije a serbowědne přednoški. Kursanća maja so na zwučene wašnje w štyrjoch kursach wuwučować – wot započatkarjow bjez znajomosćow hač k pokročenym z rozšěrjenymi znajomosćemi a ze slawistiskim pozadkom.