Nawodnistwo Worklečanskeje wyšeje šule dale z krajnym zarjadom jedna

Worklecy (SN/mb). Krajny zarjad za šulu a kubłanje (LaSuB) je na naprašowanje našeho wječornika wukazane delegowanje wučerjow Serbskeje wyšeje šule „Michał Hórnik“ we Worklecach wusprawnosćił. Wosom wučerjow ma w nowym šulskim lěće wot dweju hač do dwanaće hodźin wob tydźeń na druhich kubłanišćach we wokolinje wupomhać (Serbske Nowiny rozprawjachu). Jenož třo, kotřiž budu přidatnje w Ralbicach a Radworju dźěłać, móža tam tež serbsce wuwučować. Mjez delegowanymi je sydom Serbow resp. wučerjow, kotřiž móža wědu serbsce sposrědkować. Najebać to, tak zastupowaca rěčnica LaSuB Petra Nikolov, „njejsu žane skrótšenja w koncepće 2plus, w spěchowanskej wučbje a we wólbnym wobłuku (přidatne poskitki za sylnych šulerjow, red.) předwidźane.“