Bukecy (SN/mb). Rozpušćenje WITAJ-skupiny w Bukečanskej pěstowarni „Sonnen­eck“ (SN rozprawjachu) je w narańšich Serbach wulki njeměr zbudźiło. Na naprašowanje našeho wječornika pak nawodnica pěstowarnje Sarah Anders ničo prajić nochcyše. Ćim jasniša běše wotmołwa zastupowaceho jednaćela nošerja Dźěłaćerskeho dobroćelstwa (AWO) w Budyšinje, Holma Natschke: Je pozdatnje přemało zajima staršich. Tohodla njesmě so dotal za skupinu zamołwita pěstowarka dale konceptej WITAJ wěnować, ale ma we wšěch skupinach pěstowarnje serbšćinu jenož hišće jako „zetkawansku rěč“ sposrědkować. Kritikarjo pak so jenož na jara krótkodobnej informaciji staršim njepostorkuja, ale tež na argumentaciji: Zastupjer Bukečanskeje Bjesady Mato Krygaŕ na to skedźbni, zo „měješe skupina dotal za Bukečanske poměry chětro wjele dźěći, dźewjeć.“ Za prócowanja Serbow wo prezencu serbšćiny w zjawnosći je rozsud zahubny. Natschke najebać to potwjerdźi, zo pěstuje AWO „mnohotnosć“ a chce wšěm dźěćom pěstowarnje serbske spěwy zbližić.