Radwor (SN/BŠe). Rjadowanje 1. lětnika na Radworskej zakładnej šuli „Dr. Marja Grólmusec“ bě wčera ćežišćo wurjadnje zwołaneje šulskeje konferency. Dwaceći čłonow wopřijacy gremij, su to nimo zastupjerjow šule čłonojo staršiskeje rady a gmejnskej radźićelej kaž tež zastupjer ze stron Domowiny Wito Bejmak, bě sej přezjedny, zo ma so do lěćnych prózdnin planowane rjadowanje na šuli zwoprawdźić. To woznamjenja, zo so 1. lětnik do dweju rjadownjow dźěli. W jednej je to sydom maćernorěčnych serbskich dźěći, kotrež so serbsce alfabetizuja. Druhu rjadownju wutworja 20 dźěći.

„Zakład za to je juristisce płaćiwa zdźělenka, kotruž su starši dźěći w meji dóstali. W njej je podate, do kotreje rjadownje ma dźěćo chodźić“, rozkładźe staršiska rěčnica Katrin Suchec-Dźisławkowa. Postupowanje sakskeho kubłanskeho ministerstwa ma wona za zahubne. Šulske wjednistwo njeměło so wot ministerstwa pod ćišć stajić. Wola staršich – serbskich a němskich – dyrbi so přesadźić. Šulska konferenca je wotpowědne doporučenje šulskej wjednicy zdźěłała.