Bukecy (SN/mb). W lisće Bukečanskemu wjesnjanosće Thomasej Meltce stej Bukečanska Bjesada a serbska drastowa skupina na winowatosć spěchowanja serbšćiny po wustawkach gmejny dopominałoj. Přičina lista je njejapke rozpušćenje Witaj-skupiny w pěstowarni „Sonneneck“ w Bukecach ze stron nošerja AWO Budyšin (Serbske Nowiny su wo­spjet rozprawjeli).

Zastupjerjo Bukečanskeje Bjesady, drastoweje skupiny a staršich su hižo štwórtk wječor wo dalšim postupowanju wuradźowali, kaž Mato Krygaŕ informowaše. Wšitcy wobdźěleni běchu sej pře­zjedni, zo budźe zwoprawdźenje serbskich projektow pod tuchwilnymi wuměnjenjemi dale a ćeše. Tohodla su sej starši kaž tež zastupjerjo skupinow dorěčeli, so w tutej naležnosći z listami na wjesnjanostu gmejny wobroćić. Zasadnje wobsteji tež zwólniwosć, so na rozmołwach z nošerjom wobdźělić. Ale jenož hdyž je AWO woprawdźe zwólniwe, Witaj w Bukecach dale wjesć a wotpowědne wuměnjenja w pěstowarni za to stworić.