Šulerjo z Budyšina a Warnoćic zhromadnje na projekće dźěłaja

Budyšin/Warnoćicy (SN/BŠe). Šulerki a šulerjo Warnočanskeho biskopskeho gymnazija a Budyskeho Serbskeho gymnazija su wčera a dźensa w nahrawanskim studiju LUCIJA pobyli. Pod nawodom studija Michała Cyža tam awdija za wučbnu šćežku pod hesłom „Na serbskich slědach po Warnoćicach“ nahrawachu.

Hižo wot spočatka šulskeho lěta 2023/24 zaběraja so šulerjo wobeju kubłanišćow intensiwnje ze stawiznami Serbow we Warnoćicach w powójnskim času a dźěłaja na tematiskej wučbnej šćežce. Projektowy team wutworjeja šulerki a šulerjo biskopskeho gymnazija pod nawodom Kláry Mágroveje a Serbskeho gymnazija pod nawodom Jany Štilleroveje, dr. Jana Piňosová a dr. Robert Lorenc ze Budyskeho Serbskeho instituta kaž tež Warnočanska měšćanska biblioteka. Team zetkawaše so wjacore razy w Budyšinje a Warnoćicach na zhromadne dźěłarnički, kotrež wotměwachu w čěskej a zdźěla w hornjoserbskej a němskej rěči. To wotpowědowaše mjezy přesahowacemu charakterej cyłeho projekta.