Na šulach w Delnjej Łužicy spytaja rěč prjedownikow wožiwić

Tšupc (PB/SN). Charlottu Möller běchu wučerki a wučerjo wuzwolili, nowe ­materialije za wučbu serbšćiny přiwzać. Hižo na zastupje do šule w lěće 2021 bě sej wona mjenujcy delnjoserbsku drastu woblekła. Wona je w serbskej swójbje w Mochowje wotrostła a je jara horda na to, zo bě jej wučerka serbšćiny, Ute ­Kieper, hižo mnohe słowa nawučiła. „W mojej rjadowni su tež dźěći z Ukrainy a smy pytnyli, zo su někotre ukrainske a serbske słowa jara podobne. Tak móžemy so ­derje dorozumić“, Charlotte zahorjena rozprawja. Z rukow Susann Troppa, sobudźěłaćerki Unesco-rezerwata Błóta, přiwza wona symbolisce memo-hru, ­paslensku předłohu, booklet „Pod lapu“ a wudaće magacina „Lutki“.