Felicitas Kralowa je serbske kubłanje rozsudnje sobu wuwiwała a je horda na młodu generaciju naslědnikow

Felicitas Kralowa je wědomostnje a koncepcionelnje w nadawku Serbow skutkowała. Nětko poda so Róžeńčanka na wuměnk. Milenka Rječcyna je so ze šulskej nawodnicu, zastupowacej nawodnicu Budyskeho Serbskeho gymnazija a serbskej wučerku za wyši schodźenk, za studentow serbšćiny a wučerstwa kaž tež dorosćenych rozmołwjała.

Wuwiće na polu kubłanja so spěšnje měnja. Što sće wobkedźbowali za čas powołanskeho skutkowanja?

F. Kralowa: Hdyž běch jako wučerka započinała, smy rěčeli wo městnje archaizmow w serbskej wučbje, smy dźěłali na nowych wučbnych planach, so zaběrali z najwšelakorišimi modernymi metodami. Tak wjele kaž je so w minjenych lětach změniło, sej tehdy njejsmy móhli předstajić. Dźensa wuwučujemy w digitalnych rjadowniskich rumnosćach. Tam ma serbšćina swoje krute městno. Wučerjo dyrbjachu so sami spěšnje dalekubłać. Runje hakle smy dóstali „sotru“ a hižo je tu KI. To su wužadanja, runje za mjeńšinowu rěč a jeje sposrědkowanje.