ZARI chce na wědomostnym zakładźe wšědne serbowanje podpěrować

Budyšin. We Łužicy koleso znowa wunamakać njetrjebaja - tež druhdźe na swěće maja plan, z kotrymž chcedźa wohroženej rěči přichod zaručeć, na přikład iršćinje abo walizišćinje. Za hornjoserbšćinu drje aktualnje žana statistika njeeksistuje, kotraž staw nałožowanja rěče zwěsća, nawopak: Tak dokładnje to dotal ani wědźeć nochcychmy, wšako płaćeše princip: Nas njesmě nichtó ličić! Tohodla tež systematiski plan za wuchowanje swojeje rěče njeznajemy, a nichtó wuslědki naprawow na dobro serbšćiny njepřepruwuje. Tomu chce syć za serbsku rěč a regionalnu identitu ZARI w nošerstwje Domowiny ze swojim akciskim planom 2025/2026 wotpomhać. Tydźenja su jón w Budyskim Kamjentnym domje předstajili (SN su rozprawjeli). 32 stron wopřijaca brošura „Domoj do přichoda“ z pjera wědomostnicow dr. Cordule Ratajczakoweje a prof. Nicole Dołowy-Rybińskeje pokazuje puć k tajkemu planej.