Koordinator projekta LUCIJA Michał Cyž je tydźenja wozjewił, zo Youtube nětko „serbsce rěči“. Što to woznamjenja a kak je k tomu dóšło, wo tym je so Milan Pawlik z nim rozmołwjał.

Z dalšimi angažowanymi Serbami prócujeće so hižo wjele lět wo integrowanje serbšćiny na wulkich digitalnych platformach. Kak sće to za Youtube nětko docpěli?

M. Cyž: Koncern Google, kotremuž Youtube přisłuša, njepodawa žanužkuli kontaktnu móžnosć, zo bychmy někoho direktnje w tym nastupanju narěčeć móhli. Na našim pytanju za pućemi so z Google skontaktować, smy samo mejlki z próstwu wo podpěru do Vatikana pósłali. Wotmołwy dóstali njejsmy. Na mjezynarodnej fachowej konferency w Parisu, lětsa kónc februara, je koordinator za digitalizaciju pola Załožby za serbski lud Daniel Zoba připadnje z Google-sobudźěłaćerjom do rozmołwy přišoł a temu narěčał. Tón serbskemu fachowcej mjez druhim zdźěli, zo Serbja a serbska rěč koncernej njeznate njejsu, a slubi jemu, zo temu zamołwitym dale da. Što je skónčnje k wuspěchej wjedło, pak njeje jasne.