Na serbskich šulach zwěsćeja rěčne kmanosće

Budyšin (SN/WŽ). Serbske rěčne kompetency cyłkownje 203 šulerjow 8. lětnika testujetej tuchwilu wědomostnica Serbskeho instituta dr. Jana Šołćina a jeje team na wšěch šulach, kotrež serbšćinu po koncepće 2plus wuwučuja. Wuslědki lětušich přepytowanjow maja nazymu předležeć.

Projekt ewaluacije rěčnych kompetencow bu w lěće 2023 na třoch šulach z cyłkownje 109 šulerjemi zahajeny. Nadawk za to je kultusowe ministerstwo Serbskemu institutej (SI) w lěće 2022 dało. Wot 2024 su wšě serbske a dwurěčne šule, kiž po koncepće 2plus wuwučuja, zapřijate. To su wyše šule we Worklecach, Ralbicach, Radworju, Kulowje, Slepom a Budyšinje kaž tež Serbski gymnazij.

Kaž dr. Jana Šołćina zwěsća, maja šulerjo najwjetše ćeže we wobłuku zrozumjaceho čitanja. „Dokładne čitanje a cyle zaměrne wufiltrowanje informacijow, to ani maćernorěčni šulerjo hižo we wšěch padach njezamóža“, wona skonstatuje. Tež zrozumjace słuchanje mnohim ćežko padnje. Přičina za to po měnjenju wědomostnicy je, zo njezamóža so šulerjo dlěši čas koncentrować.