Změna na čole Chróšćanskeje gmejny je nětko tež oficialnje zmištrowana. Na wčerawšim posedźenju gmejnskeje rady bu nowy wjesnjanosta Marko Kliman (CDU) spřisahany a ma nětko ceptar komuny w rukomaj.
Chrósćicy (SN/MWj). Dotalnemu wjesnjanosće Maćijej Brycce so radźićeljo wčera za jeho skutkowanje na dobro Chróšćanskeje gmejny dźakowachu. Zastupowacy wjesnjanosta Jan Wjesela rjekny, zo je Brycka „šěroki puć wuteptał“, po kotrymž móža nětko dale kročić. Prawočan bě w swojim hamtskim času mjez druhim twar dróhi přez Chrósćicy, nowotwar Hórčanskeje a Nukničanskeje gratownje a móst pola Kopšina na starosći měł. K tomu přińdźechu mjeńše předewzaća, kotrež su wšědny dźeń lědma widźeć. Dotal njezwoprawdźene projekty, kaž puć z Chrósćic do Hórkow, změje nowy wjesnjanosta na starosći.