Nowosć na dnju wotewrjeneho pomnika na Budyskim Židowje
Budyšin (ESm/SN). Přewšo zajimawa adresa na dnju wotewrjeneho pomnika 13. septembra w Budyšinje budźe Hamornik na Židowje při Sprjewi. Młyn, kotrehož stawizny sahaja hač do lěta 1493, njeje jenož wuznamny twarski a techniski pomnik, ale dźensa tež zaso rjemjeslniske produkciske městno za młynske wudźěłki.
Stawizny Hamornika su jara rozdźělne. Po spočatnym wobdźěłanju železa nasta wokoło 1740 mašinowa fabrika. Wot lěta 1888 zhotowjachu tule zaso młynske produkty. Po Druhej swětowej wójnje bě młyn wažny zastaraćel pjekarnjow a wobydlerjow z muku. Pozdźišo předźěłachu chmjel za piwarnje, wot 1986 pak picu za ratarske zawody. 1989 přestachu produkować. Techniske připrawy pak jenož njewobchowachu, ale je dale wudźeržowachu. Wo to starachu so předewšěm Manfred a Maria Löcken-Hierl a Stephan Hierl, kiž młyn lěta 2003 přewza.