Chróšćanski cyrkwinski chór hodowny koncert wuhotował

Chrósćicy (aha/SN). Hač na někotre městna na chórje bě wčera popołdnju na tradicionalnym hodownym koncerće Chróšćanska cyrkej połnje wobsadźena. Wosadny farar Měrćin Deleńk hódnoćeše přihot čłonow Chróšćanskeho cyrkwinskeho chóra, dźěćaceho chóra Budyskeho Serbskeho gymnazija, małeho orchestra a instrumentalistow na tak wosebite wužadanje a wupraji swój dźak předewšěm Bernadett Hencynej, kotraž bě wosmy raz cyłkowny nawod wuběrneho koncerta přewzała.