Budyšin (SN/MWj). Lědma zo je so z prěnimi nalětnimi dnjemi nowa sezona motorskich započała, je minjeny kónc tydźenja na dróhach Zhorjelskeje policajskeje direkcije k třom ćežkim wobchadnym njezbožam dóšło, na kotrychž běchu wodźerjo motorskich wobdźěleni. Mužej w starobje 46 a 51 lět so při tym ćežko zraništaj, 62lětny je samo žiwjenje při­sadźił.

Stali su so njezboža, dokelž wodźerjo mašinow trěbny wotstawk k před nim jěducym dodźerželi njeběchu a dokelž stachu so jim zmylki při přesćehnjenju, pisa policajska direkcija w nowinskim wozjewjenju. „Z nazhonjenjow po­licije wuchadźa, zo sej mnozy bikerojo nastupajo swoje kmanosće jězdźenja přewjele při­cpěwaja a zo fyzikaliske mocy pospěšenja a spinanja wopak posudźuja“, w zdźělence dale rěka. Policija radźi tohodla k wobhladniwemu a kedźbliwemu jězdźenju. Dokelž je so sezona runje hakle započała, měli so motorscy hakle poněčim na swoju mašinu zaso zwučić.