Nalětni nałožk na mnohich wsach dostojnje přihotowali a přewjedli
Pančicy-Kukow (SN/MWj). Jara wjele ludźi je sobotu do Kukowa přišło a dožiwiło, kak tam dohromady 40 porow w třoch starobnych skupinach wokoło meje rejuje. Mjez mjeńšimi dźěćimi bě Janek Pjetaš najspěšniši a wuzwoli sej Lotu Pjetašec za kralownu. Hanka Clausenec a Fabian Ledźbor běštaj mejski por wjetšich dźěći a Jan Bětnar jako najspěšniši młodostny wuzwoli sej Alenu Bětnarjec za kralownu. Wječor knježeše wulkotna zabawa z kapału SerBeat. Młodźina předstaji znowa serbsko-němski program a pokaza w nim samo erotisku reju muži. Tež wčera bě cyły dźeń wjele ludźi na Kukowskim swjedźenišću, dopołdnja na rańšim piwku z Chróšćanskimi muzikantami a popołdnju na programje Smjerdźečanskich rejwarjow a dźěći Pančičanskeje pěstowarnje. Dźakowano něhdźe 40 pomocnikam wokoło Olivera Vaceka, Norberta Walichta a Tobiasa Heichela bě Kukowske mejemjetanje znowa kaž wjesny swjedźeń.
