Ze 70 000 eurami ma město Budyšin regionalnemu koparskemu ligistej Budissy Budyšin pod pažu přimnyć. W měšćanskej radźe, kotraž wo tychle pjenjezach rozsudźi, pak nimaja to wšitcy jeje čłonojo za woprawnjene.
Budyšin (CK/SN). Z wuwzaćnej financnej pomocu 70 000 eurow spěchuje město sportowe towarstwo FSV Budissa Budyšin. To je wjetšina měšćanskeje rady na jeje zašłym posedźenju schwaliła. Pjenjezy su myslene jako přiražka za kóšty wobhospodarjenja dorostoweho wukonoweho centruma w Humboldtowym haju, kotryž je towarstwo same modernizowało. Kaž wyši měšćanosta Alexander Ahrens (njestronjan) měšćansku radu informowaše, su nimo toho strukturne změny trěbne, zo by towarstwo – wothladajo wot sportoweho wukona – w regionalnej koparskej lize wostać móhło. Hewak by tež dalše dorostowe dźěło wohrožene było.
