Swoju žiwjensku kwalitu z kubłanjom, kulturu a sportom chce sej město Wojerecy wobchować. Kaž z hospodarskeho plana 2016 wuchadźa, komuna swoje zadołženje dale pomjeńša.
Wojerecy (AK/SN). Z hospodarskim planom 2016 město Wojerecy puć konsolidowanja konsekwentnje dale kroči. „Tak pomjeńšimy swoje zadołženje pod krajnu směrnicu 850 eurow na wosobu. Perspektiwisce přińdźemy na zadołženje 800 eurow na wobydlerja“, rjekny wyši měšćanosta Stefan Skora (CDU) wčera na posedźenju měšćanskeje rady. Jeje čłonojo 58 milionow eurow wopřijacy etat jednohłósnje schwalichu.